意外

諗住落平台放放電，點知發生了意外⋯⋯細佬玩scooter時同對頭撞到，跌落地，頭流血⋯⋯嘩，嚇鬼死人！！一扶起佢，成手都是血！！嚇死，所以林太打了電話call白車。由白車帶入急症室。今天急症室好忙哦，全都是需要瞓床的公公婆婆。而且依個疫情，見到隔離嗰個咳，或者面紅紅，怕人哋發燒，就搬位坐，搬到無位坐。入到急症室，見完分流護士，見到是分流「4」，都知會有排等⋯⋯排見醫生，排照CT，排縫針，縫了兩針，由5:10pm攪到10:10pm，嘩嘩都小睡了20分鐘⋯⋯不過，總算是不幸之大幸！！

嚇鬼死的一天！！

事原係昨日6:00am，突然聽到巨響！！原來係細佬從林生林太的床上碌落地下！！細佬偷偷地爬了上林生林太的床上，瞓咗係邊邊，林太完全沒有察覺，林太一轉身就推咗佢落床！！細佬大哭！！聽到哭聲，應該冇事吧？！就叫佢再睡⋯⋯點知6:30am開始嘔，都係有啲擔心，立刻入了急症！

7:00am到了QM急症，細佬都繼續有嘔，嘔些黃色物體，超驚！！急症室都有人等，好彩排了快症，8:00am已完成診症，照了CT，個腦冇事。九點幾上到兒科上床休息，觀察二十四小時⋯⋯

當他入睡後，再起身嘅時候完全冇事！！好似差足電咁！！但醫生話都要繼續留院觀察⋯⋯細佬喺醫院食得，但不是太瞓得，係咁搵人講嘢⋯⋯又唔可以落床⋯⋯林太仲要24小時陪瞓，沒有加床服務，沒有毛氈可借，只有一張膠櫈！！母愛真偉大，手痺頸痛腳痺⋯⋯一些長期病患的小朋友既媽媽們，辛苦你們了！！

瞓咗一晚，第二日都好正常！出院喇！！