劍擊 // 第三屆文燕盃

林太又係Facebook搵到免費劍擊比賽，平時一個劍擊比賽要$500至$600，當然立刻報啦，好彩又抽到！！其實林太覺得細佬實力未夠，所以林太唔想俾錢去輸，有免費的比賽，就去練吓吧！！不過，經過暑假上多幾堂，好似又好咗啲，姿勢靚咗少少⋯⋯竟然出到線！！再接再厲吧，加油！

貴州研學團五日四夜 // 圍棋比賽 // 甲秀樓 // 花果園藝術中心

今日沒有行程，只是比賽！！有七局嘅比賽！！林太當然是周圍逛逛，行咗去甲秀樓，打了卡！！再去飲一杯咖啡，好似香港的Dirty，凍奶加咖啡，只需¥13，咖啡店外仲有免費香煙給客人自取！！返去陪太子食個飯，再去逛逛，去了附近的商場，冇乜嘢買，又回去陪太子！！除咗今天的比賽，其實依幾日，一有時間，佢哋就會練習！！雖然唔係密集式，但係好好建立感情的時候！！今日比賽有殿軍，但係阿Sir話佢可以做好啲，原因是尋晚打咗機！！？因為尋晚的狀態比今日更好！！唉⋯⋯捉完圍棋比賽，細佬就攞中國象棋出嚟切磋切磋，哈哈哈！！今日其實完全冇行程，又早食完晚飯，所以就打的帶細佬去「貴陽白宮」，真名是「花果園藝術中心」。有夜市，有商場，食個宵夜，玩吓，就返去酒店了！！

行程：今日行程只有一個，就是貴陽市內圍棋比賽 — 雲松圍棋學校。

圍棋 // 善弈棋苑2025夏季圍棋級位賽—中級組 // 香港棋藝教育2025初夏圍棋季度比賽—2016年組

就快放暑假，林太懶得編排行程，星期六日/七一放假，無嘢做。Last minute 報咗圍棋比賽，等細佬去hea吓，哈哈！！一個第八，一個第二（仲要係同第一同分，抽籤決定）。

LamBB's award // 學業成績進步獎

哈哈哈⋯⋯數學由74分，到今個學期的94分，這20分帶給他一個「進步獎」。但中、英文成績不變！！哈哈哈！！所以下次仲有機會會攞進步獎！！加油加油！！

圍棋 // 四月圍棋評級賽

順利升上B組，第12級！！Keep going！！

圍棋 // 第五屆“元蘿蔔杯”少兒跨年圍棋積分挑戰賽 （4-6級） // 第二十三屆香港業餘圍棋公開賽 （11-15級組別）

細佬由農曆新年開始，每日捉兩局棋，捉了30日。第一次參加，唔知道有「報到分」和「連贏分」，因為咁樣可能少咗100分。哎喲差少少，就入到頭20名，頭20名才有證書。嗚⋯⋯下次再努力吧！而星期日又去了另一個圍棋比賽，老師介紹的，全香港最有規模的圍棋比賽，因為是香港圍棋總會舉辦的。雖然分級比賽，但唔叻嘅都唔會參加，所以感覺上較難！細佬中規中矩吧，3勝2負，排15，32人參加，中間。加油！！

第五屆“元蘿蔔杯”少兒跨年圍棋積分挑戰賽

分級：6級-4級

比賽日期：2025年1月18日 - 2月18日 9:30 - 21:30

次數限制：20/2次（每日可對弈2局）

第二十三屆香港業餘圍棋公開賽

參與組別﹕11至15級組

時間﹕14:00 - 18:00

比賽地點：長沙灣瓊林街82號陸佰中心3樓C-D室

https://www.hkga.org.hk/?p=3138

圍棋 // 二月圍棋評級賽

好，又升一級！！恭喜恭喜！！繼續努力！！

圍棋 // 第七屆楊士海盃中小組

又是細佬的圍棋週末，佢最開心！！星期五上課，星期六上課+評級賽，星期日第七屆楊士海盃中小組。分齡的比賽，知道難打，一定會有勁人，棋力差好遠，不過佢話捉，go ahead！！一開始比賽，給老師看了名單，若三勝已不錯！！結果，六場，三勝三敗！！幾好幾好！！林太想定下目標，2025年升十級！！下年年尾，五級！！可以參加更多更好的比賽！！喜歡就繼續鑽研吧！！加油！！

圍棋 // 2024聖誕圍棋賽

其實今個學期開始已經沒有在學校學圍棋，因為上咗中文補習班。原來這個比賽只開放比院生，林太又唔睇報咗，好彩佢哋好人，可以參加！！仲攞了第六名！！有緣再見！！

第四屆香港競技疊杯運動新秀賽

細佬自己揀的課外活動「疊杯」，對於林太來說一小時只練習把杯子疊高又放回原處，在一個小時內不斷重複，真係好不可思議！！細佬喜歡求變，竟然可以重複做同一樣的動作，難以置信！！所以”go ahead”，參加了！！上了七堂，第一次的比賽，參加了兩項的接力比賽。Good try！！

日期：2024年12月14日

地點：東華三院姚達之紀念小學（元朗）

地址：新界天水圍天瑞邨第一期

比賽項目：

        C. 二人3-6-3接力對抗賽

        D. 學校單位3-6-3團體接力對抗賽

圍棋 //圍棋評級比賽

久違的圍棋冠軍！！不過，都是好彩。第一次因網絡關係所以從賽。從賽時一邊溫習，一邊比賽，結果是出奇的專心！！Well done！！

林家放暑假2024 // Allstar比賽

細佬第一次打團體賽，教練話差一個人，所以參加了。去到發覺其他團體的得三人，細佬變成大後備。去到全新的GO Park，只得一間餐廳，最少一小時排隊⋯⋯又熱又餓，食food truck頂住先。但原本1:00pm開始，最後2:30pm才開始⋯⋯其實佢已經無乜mood，第一場又無出場，到第二場先出。出去打五分，不停輸！回來時，比教練罵！！不是罵失分，而是平日的不認真！！！這個是細佬的弱點吧！！唉⋯⋯但全家人山長水遠來，陪你買這個教訓！！好好記住吧！！

圍棋 // 2024回歸盃圍棋賽

依張報名表見過幾次，嘩嘩講了幾次⋯⋯本來諗住週末返大陸玩吓，但最後吱吱要考五級樂理，咁就參加吧⋯⋯經上次的經驗，第二名至第五名是同分，靠細分分名次。所以一早同細佬講定，要贏就贏盡些，食多幾粒！哈哈⋯⋯但最後都是第五！！知道佢用了力，要食餐好的！！韓燒！！

Primo U8 Epee

大大話話細佬已經學咗劍擊四年，有時真係好想放棄，佢Hea下Hea下咁上堂，都唔知道佢鍾唔鍾意？！但係每次見到佢勝利嘅笑容，真係好心甜！！一個由心而發，自己爭取每一分的勝利，自信心的笑容！！男孩子就是這個「charm」吧！！細佬，加油啊！！

AFHK 2024 Easter Cup Competition U8 Epee

復活節留港消費，就係俾錢參加比賽，攞返個獎牌留念一下！！哈哈！！細佬，你團火幾時先出？！

圍棋 // 2024復活節盃圍棋賽

原來細佬只學了圍棋一年，短短的時間，已經參加過好多次比賽！！有時候，只要小朋友喜歡，就會自發地做！！記得細佬剛剛學的時候，就是第一次係依到參加比賽，記得結果是「全敗」，玩了四局之後，佢個樣攰到⋯⋯林太永遠都記得，因為未見過佢咁攰，哈哈哈！！但之後，佢屢敗屢戰，今次又要返返嚟比賽！！已經升咗一級，C1組，結果是四勝一敗，殿軍！！噢，又是殿軍，不過好彩都有個盃仔！！下次再努力吧，向頭三名進發！！

Pokémon Run 2024

林生真係好鐘意跑步，拉埋細佬跑1.5km親子跑！！細佬跑之前都諗住自己好勁，叫林生唔好跑咁慢⋯⋯結果，當然是攰到跑唔郁！！哈哈！！

圍棋 // 棋力評估（一、二月） // 慈善小棋王［初小組］

升了組，又變了組內的最低級⋯⋯依兩次比賽時的網絡麻麻，彈咗出嚟兩次當棄權，唉⋯⋯不過，真係捉唔贏，要再努力！！參加咗慈善小棋王，分齡比賽，都知道同年紀嘅小朋友有啲會好勁，所以有心理準備沒有獎。不過，多參加實體賽，感受一下多人/集體的壓力，也是一件好事！！結果，第四，與大獎杯無緣，下次再努力！！加油！！ 

2024農曆新年揮春設計比賽

又是林太在Facebook見到的比賽，見不用報名費，就玩吓啦！！其實係吱吱畫一張，細佬畫一張，但最後用了細佬的名字參加，因為佢初小，易啲贏吧！？不過林太心諗，佢哋畫到咁核突，點會贏啊⋯⋯結果，喜出望外，攞了冠軍！！仲免費送了十張揮春，哈哈，又幾開心喎⋯⋯

60周年校慶 // 60周年校慶親子口號設計比賽

細佬學校60周年，今個星期都唔駛返學咁既樣，哈哈！！老師和要表演的同學就忙過不停，辛苦曬！！最後，參加了親子口號比賽，有個季軍，有幸能參加頒獎典禮，和睇表演！！

「與基督同行 樂在鮑聖園」

聖安多尼六十載

知恩感恩滿仁愛

善良謙遜樂滿載

鮑聖精神常同在

鮑聖精神 — 鮑思高神父預防教育法的原則

鮑思高神父把預防教育法的原則濃縮在這句精簡的說話裡：「這種教育法完全建立在理智、宗教和慈愛上。」它們彼此之間的關係好像是一個三角形，不能缺一。這教育法的實施完全根據聖經的說話：「愛是慈祥的，含忍的，凡事包容，凡是盼望 (改善)，凡事忍耐。」鮑思高神父的一生就是這些原則的實現。

林太一直以為校徽中間的是一隻白鴿企在十字架上，但原來是一朵百合花。

百合花象徵上帝的恩典，這恩典如此聖潔、慷慨、豐盛、美麗與奧妙。百合花也象徵人對上帝的信心，這信心如此專一、忠貞、敬虔、珍貴與潔白。哪裡有這百合花的恩典，那裡就有這百合花的信心；哪裡有這百合花的信心，那裡就有這百合花的恩典。
深信聖安多尼學校滿有上帝的恩典，亦以鮑思高神父的精神，用信望愛來培育下一代。