Happy 13th Anniversary // Sushi Kit

林太趕返香港，就係為咗食呢餐，哈哈哈⋯⋯Happy Anniversary！！林太點會相信林生乜都冇準備呀，林生咁着重儀式感，thank you！！灣仔新嘅日本餐廳，地址確實有啲難搵；聽到佢啲舊客講，舊址是在九龍城？！午餐的omakase，當然豐富啦⋯⋯嘻嘻嘻嘻⋯⋯

https://www.sevenrooms.com/explore/sushikit/reservations/create/search/

林太偷走到土耳其Day16 // 金色不如帰

繼續坐飛機⋯⋯由杜拜去香港嗰程機，林太冇留意要stop-over，因為機票冇寫「stop」的地點，只寫「1 stop」。原來與嚟的時候一樣，停一停泰國，比人落機，之後清潔，再有新的一批工作人員/乘客上機。都要兩個幾鐘，又唔準離開坐位，又無得去廁所（清潔中），真係無所事事。唯有繼續睇戲，睇咗 《A Toast to Love》《Passport to Love》，都是平鋪直述的愛情故事，不過風景好靚，可以一睇。杜拜返香港話咁快落機，去到香港機場，食返碗麵 — 貝汁醬油拉麵，米芝蓮一星，個湯真係好鬼香！！林太的悠長假期就完啦，Bye Bye！！

林太偷走到土耳其Day15 // Galataport // ByeBye

咁快就玩咗兩個星期，總結一下土耳其最喜歡的地方是：Taksim，可以再食的特色食物是：土耳其雲吞。所以今早執完個篋，check-out之後就過了Taksim嗰邊，搵吓邊度有土耳其雲吞食。行行吓，入咗Galataport（比郵輪停泊嘅地方）。入面又幾靚喎，食物好似貴少少，不過也可以接受。食飽飽之後，諗吓仲有咩未做？！林太想飲多杯 original cola (cola + espresso + dried lime)，朋友仔想食杯土耳其雪糕（俾人玩嗰種）。今日星期六，所以好多人，俾人玩食雪糕嘅地方都排隊，結果是是是旦旦⋯⋯哈哈哈⋯⋯返酒店，準時坐巴士出機場，結束今個旅程⋯⋯

林太偷走到土耳其Day14 // Teras Restaurant // Grand Bazaar // Hagia Sophia Museum // Hafiz Mustafa 1864

今日特登預約了食早餐！！遠遠的地方已見到一群海鷗，就是去嗰度食早餐！！大廈其實唔係好高，只不過其他是平地，所以望返個清真寺好清楚，又有海鷗做背景！！試了他們的大大份早餐，乜都有啲，勁多芝士！！最後當然食唔晒啦，原來食唔晒嘅早餐就是用來餵海鷗，侍應會攞去切成細細塊，有膠叉供應，唔食早餐都可以上嚟免費餵海鷗。啲海鷗真係好大隻，所以都不是太討好，影完相就走了。之後去了Grand Bazaar ，都係冇咩特別嘢買，八成係賣A貨，所以空手而回⋯⋯有時間多，行埋Hagia Sophia Museum。睇完之後，先知道Sophia Mosque是歷史最悠久，最值得參觀的一個。原本是羅馬帝國到土耳其起的基督教教堂，經過歷史變遷，最後變了回教的清真寺。個圓頂更是第一次起嘅圓頂，之後計算出錯，倒塌過再興建。依個博物館幾有趣！！喺土耳其咁多日，諗緊有咩想再食，結果林太選了燒魚，因為尋晚嘅fish wrap覺得啲燒魚唔腥，所以可以成條一試！！又幾好食喎！！真係一啲都唔腥，而且幾鮮甜！！食完仲可以食返個甜品，「Hafiz Mustafa 1864」周圍都有，店內有陣香味，所以臨走前都要一試。試了他們的芝士甜品，鹹鹹甜甜又幾好食喎！！

Hafız Mustafa 1864

林太偷走到土耳其Day13 // 亞洲 // Egyptian Bazaar (MISIR CARSISI）

今日坐船過去土耳其的亞洲部分，二十幾分鐘的船程就到，幾方便，而且又平！！過到去諗住食「fish wrap」，但竟然無得賣！！哈哈哈⋯⋯亞洲區出名是有大大幅的壁畫，題材好random，不過幾靚！！亞洲區感覺好似較繁忙，多車多巴士多金舖。不過，無咩嘢行/買。最後，坐船返返去，又是遇到日落，好晒呀！！之後，逛逛Egyptian Bazaar，好似 Spice market咁，都係買唔到嘢，所以決定早點吃晚飯，之後喺酒店試吓 Turkey bath。林太叫佢做「卒老泥浴」！！有點像一隻大肥豬在砧板上，俾人醃製！！哈哈哈哈⋯⋯

林太偷走到土耳其Day12 // Yerebatan Sarnici Museum // Blue Mosque

尋晚嘅青口搞到勁肚痛，今朝胃口都不太好，所以早餐食咗好少嘢。今日唔使飛，不過會轉酒店，轉一間靚仔啲，作為今次旅行的總結。Check-out後就去新酒店check-in，之後搵佢哋嘅郵局（叫「ppt」），寄完Postcard之後就到「地下水宮殿」（Yerebatan Sarnici Museum）。曾經是神殿/地下水庫，十分有趣！！林太見排隊的人龍不多，所以最後冇上網買預訂門票（網上的較貴）。入到去順流行一個圈，燈光會轉變，所以大家都在等唔同嘅燈光影相。行完出嚟又到下午，可以食嘢，哈哈！仲未試過土耳其薄餅，就試試看吧！又幾好食喎！！仲試了他們的甜品和土耳其咖啡！！之後就行過去Blue Mosque，女士們記住要包頭、長袖衫、長褲。是免費入場，入去前記住除鞋，個個都除鞋，所以入面有少少臭腳味⋯⋯清真寺嘅圓頂真係好靚，是古時的人觀看日月星辰計算出來的圓頂，相信亦可以靠近神。睇完之後返酒店換件衫，着返件褸準備夜遊伊斯坦堡。一早預約了這個「船河」，可以睇到兩邊嘅風景，包了3 courses dinner，汽水無限暢飲，仲有土耳其各種民族舞睇⋯⋯節目都幾豐富！！十分之準時，由晚上八時半玩到十一時半。

http://yerebatansarnici.com/

林太偷走到土耳其Day11 // Dolmabahce Palace // Ataturk Cultural Museum

尋日check-in時，先知道酒店包早餐，咁多日林太都冇食早餐，因為未醒哈哈哈⋯⋯所以今日特登早啲起身，爬落去食早餐！！最驚喜是他們有honeycomb，好正呀！！之後，就學坐叮叮，「過海」去睇皇宮。其實而家土耳其已經再沒有皇室成員，但之前嘅皇宮/有錢人住嘅地方就變咗博物館開放，Dolmabahce Palace有多個打卡點，好似幾靚，就去睇吓！！所有室內地方都唔可以影相，林太有偷偷地影幾張，確實幾靚！！值得一看！！林太仲買了一粒Sultan Stone戒指，希望能夠得到以前嘅Sultan眷顧，可以有錢啲（以前嘅皇親國戚/有錢人，個姓都係Sultan）。哈哈哈⋯⋯行到勁攰，所以坐低飲杯嘢先，再行去搵午飯。去咗間食土耳其雲吞，傳統嘅土耳其雲吞好似我哋嘅水餃，細粒啲，都係烚嘅；而家有炸嘅。兩樣都試了，不錯啊！之後行返去Ataturk Cultural Museum睇他們的圖書館，因為他們的圖書館已列入世界最漂亮圖書館頭十名，哈哈！！圖書館真係好新，仲有好多位放書！！其實最想睇他們裏面有個圓波波設計的Türk Telekom Opera Hall，應該會有一流的音色，可惜冇開⋯⋯唯有繼續行其他地方，晚上試咗佢哋嘅青口，青口釀飯！！好搞笑！！味道可以嘅，但食完之後林太肚痛了⋯⋯還是甜品太甜呢？因為林太試了土耳其出名嘅甜品，baklava，真係甜到一個點！！！