Sushi N

今日無端端有得食omakase，哇哈哈！！當然是林生成日去日本有日本嘢食，今日要慰勞一下林太啦！！今日有一個新師傅，都不錯喔！！Labubu都有去啊！！

Sushi N: 銅鑼灣恩平道42號亨利中心12樓

February’s lunch box

個新年假又放完，回復正常，朝朝煮飯，好似有啲悶添？！有沒有新點子？

Sofi Pasta Co.

近期出名排隊的餐廳，林太心思思成日想去，林生返咗嚟，就叫佢去啦，哈哈哈！！但今日有第三者在場，就是「Labubu」和「Crying baby」，哈哈哈！！！Sofi Pasta Co. 早上係有開門賣咖啡的，到上午11:30開始就有煮食供應。所以11:30前到達，飲定咖啡，等食午餐，就不用排隊了！！！食完之後，真係見到長長嘅人龍⋯⋯⋯今日試咗佢個花椒油意粉，辣辣地，好過癮！！跟餐有杯泡茶，味道應該是烏龍茶，如果再特別少少，就會開心啲啲！！細細間cafe，好cosy，好warm，好有味道！！https://www.instagram.com/sofipasta.co?igsh=Zms3eDJnejF0amRl

Nissa la Bella

林太見到Restaurant week咁鬼抵，就即刻預約了，睇唔到係專為滙豐信用卡客戶，哈哈哈！！好彩朋友仔有，朋友仔們真富貴，哈哈哈！！$148 3 courses set lunch，還有coffee  / tea，去邊度搵啊？哈哈哈⋯⋯本來以為餐廳會冇乜人，出奇地平日的中午都坐滿喎！！佢嘅頭盤有法國田螺，香草汁超正，包都食得兩件！！主菜嘅魚就普普通通。不過最緊要都係，thanks for my food buddy！！

偽單親 // 21-26.02.2024

林生去咗大阪跑馬拉松六天，林太又做偽單親一打二。遇上政府捉白牌車，的士罷工，Uber搵唔到的士，林太張信用卡俾人盜用cut咗，加上測驗考試⋯⋯ 所以過了又正常又悶的六天。

偽單親 // 機場櫻花園

林太一個人無無聊聊走咗入東涌賞花，新的《機場櫻花園》。知道未「盛開」，但都想看看！！有幾棵可以影一影相，幾靚哦！！

第五屆“元蘿蔔杯”少兒跨年圍棋積分挑戰賽 （4-6級） // 第二十三屆香港業餘圍棋公開賽 （11-15級組別）

細佬由農曆新年開始，每日捉兩局棋，捉了30日。第一次參加，唔知道有「報到分」和「連贏分」，因為咁樣可能少咗100分。哎喲差少少，就入到頭20名，頭20名才有證書。嗚⋯⋯下次再努力吧！而星期日又去了另一個圍棋比賽，老師介紹的，全香港最有規模的圍棋比賽，因為是香港圍棋總會舉辦的。雖然分級比賽，但唔叻嘅都唔會參加，所以感覺上較難！細佬中規中矩吧，3勝2負，排15，32人參加，中間。加油！！

第五屆“元蘿蔔杯”少兒跨年圍棋積分挑戰賽

分級：6級-4級

比賽日期：2025年1月18日 - 2月18日 9:30 - 21:30

次數限制：20/2次（每日可對弈2局）

第二十三屆香港業餘圍棋公開賽

參與組別﹕11至15級組

時間﹕14:00 - 18:00

比賽地點：長沙灣瓊林街82號陸佰中心3樓C-D室

https://www.hkga.org.hk/?p=3138

二月圍棋評級賽

好，又升一級！！恭喜恭喜！！繼續努力！！

Happy Valentines 2025

今年無咩準備，最後見星期五，又未到考試，所以偷走出去食晚飯。但結果行來行去，無位，入咗去都要等45分鐘。之後，仲要睇咗套勁長勁悶嘅戲⋯⋯真係情人節快樂！！

香港校際合唱節2025比賽暨大師班

又來追星，今次好好多，不用排隊，只是上網預購門票就可以了。而且是高級組，其他學校又冇咁多人追星，所以好易買飛！！哈哈哈⋯⋯「大師班」原來是指比賽後會有大師指導，so good！！林太相信「名師出高徒」，真係俾高人指點吓立即好好多！！

渣打馬拉松2025 （半馬） // 全港競技疊杯運動公開賽2025

又一年，林生第二次跑的半馬，又係遇上細佬要比賽。上年細佬去咗踢波，今年是競技疊杯比賽，都是要拜託梁媽媽帶佢去。林生第二次跑，有沒有再創佳績？哈哈哈⋯⋯

年初五的長洲

好似好耐冇嚟長洲，星期天去長洲走走⋯⋯今天遲咗出發，去到飲完咖啡再食串燒。之後才踩單車，去張保仔洞，所以人比較多，入去張保仔洞都要排隊！！而且，人太多，張保仔洞出口的樓梯已經俾人踩爛咗，大家都要你踩我踩你咁出去！！

年初三的山頂

大年初三赤口，唔知由幾時開始，初三要上山頂，所以上了山頂。沒有發生口角，順利完成！不過依幾日太累，下午各人都瞓咗一個大午睡！！

大年初一、二 // 金蛇迎福

新年快樂，身體健康！！新的一年，新的開始！！今年只希望小朋友學業「猛」進！！加油加油！！其實農曆新年每天的節目都是「家訪」，家人互相探望！！就是天天都見着一樣的人，但在不同的地點，哈哈哈！！！

迎春接福

林太經過上年的教訓，新年時沒有時間整頭髮右手指甲。所以今年，特意提早做！！染好頭髮，油了手指甲！！買了新衣服！！預祝各位鴻運當頭，更進一步！！

團年飯 2025 // 維園年宵

就快新年，當然要食團年飯，團團圓圓，一家團圓，齊齊整整！！今年各位仍是健健康康，感恩！！願祝各位身體健健康康！！今年都有行年宵，不過冇咩好買，哈哈哈⋯⋯

LamB’s first ink painting

終於放假啦，應承了家姐的畫畫課，今次揀了水墨畫，應吓節！！新年快樂，畫返幅牡丹圖，預祝各位花開富貴！！

January’s lunch box

龍年煮飯仔收爐！！細佬中午時趕住去玩，成日唔食飯，麻鬼煩！！激死人！！不過，送飯時見到佢嘅笑容，真係甜到入心！！嘻嘻！！

油尖旺青少年劍擊比賽 // U10男子重劍

雖然細佬開始「減操」重劍，但見到「免費」比賽林太又報了！！哈哈！！因為免費，所以勁多人參加，但又抽到喎！！其實細佬不想參加，幸好有佢的好朋友一齊參加了！！細佬的朋友仔，今年的同班同學，他今年才開始玩劍擊，希望朋友可以延續細佬對劍擊的「火」！！加油！！